最近董伯伯走出嚟話通識教育完全失敗，所以引致年輕人思想偏激、唔再聽當權者嘅話、從而做出激烈行為危害社會。在此我覺得有必要探討一下到底乜嘢係通識教育，然後請有幸睇到呢篇文章嘅讀者自行判斷董伯伯講得啱唔啱。
首先通識科嘅誕生係因為一直以嚟香港教育被喻為填鴨式教育，大部份嘅學生都係求學為咗求分數，所以訓練出嚟嘅學生都有一個特質：就係背書好叻，但當一啲問題係冇得死記，要靠自己思考就唔知點去攞高分。由此可見通識嘅初衷係培養學生獨立思考及分析嘅能力，然後使到學生們能夠從多角度好立體咁去分析事與物，唔會再盲目對接收返嚟嘅訊息100%照單全收，而係經過自己嘅分析，融匯貫通後得出一個自己能夠接受嘅說法。所以如果從初衷去睇，通識教育係成功嘅，因為你會見到年輕人唔會再政府講乜佢就follow乜。
當然從管治者角度，學生有咗自主思想，要進行思想改造就唔係再咁容易啦。而正正係因為呢一點董伯伯先會走出嚟話通識教育完全失敗，其實青少年反叛難搞就係人都知，都唔係咩新鮮事情，再加上internet同社交網絡嘅光速發展，訊息傳遞速度快，而政府又反應一貫慢速，先會導致民情同政府嘅睇法有巨大落差。
講到呢度您可能會問：同占卜睇牌有咩關係呢？當然有啦，一個好嘅塔羅師需要從多角度去睇牌，死記並背誦牌義只會令到解牌變得公式化、機械化同缺乏趣味，記住解牌係一個互動嘅活動，如果大家有過嚟搵過我或Rachel睇牌就會發現就算同一張牌我哋都經常有唔同解法，並唔係一本通書睇到老㗎。大家要留意啦！
Comments